Pellegrini tat-Tama Ferħanin

VERŻJONI BL-INGLIŻ

L-Ewwel Parti: Fit-Triq lejn Għemmaws: Luqa 24:13–27

Preżenza: Fil-bidu ta’ din il-mixja, nikkalma u niftaħ qalbi għall-preżenza ta’ Kristu miexi miegħi. Bħad-dixxipli, jien ukoll forsi qiegħed inġorr mistoqsijiet, diżappunti jew dubji. Inħalli din il-mixja tkun opportunità għar-riflessjoni onesta u ftuħ spiritwali.

Fejn ninsab spiritwalment bħalissa? Miexi lejn Alla jew il-bogħod minn Ġerusalemm – il-post tal-laqgħa spiritwali?

Bħad-dixxipli, liema diżappunti, disillużjonijiet jew dubji qiegħed inġorr?

Nitlob dak li nixtieq: Nazzarda nitlob lill-Mulej il-grazzja li nixtieq nirċievi mingħandu b’tama li Hu se jagħtini jekk nitolbu.

Test: Lq 24:13-26
¹³ Dak in-nhar stess ġara li tnejn minnhom kienu sejrin lejn raħal jismu Għemmaws, xi sittin stadju bogħod minn Ġerusalemm, ¹⁴ jitħaddtu bejniethom fuq kull ma kien ġara. ¹⁵ Huma u jitħaddtu u jitkixxfu bejniethom, Ġesù nnifsu resaq lejhom u baqa’ miexi magħhom. ¹⁶ Imma għajnejhom kellhom xi jżommhom u ma setgħux jagħrfuh. ¹⁷ U hu qalilhom: “X’intom tgħidu bejnietkom intom u miexja?” U huma waqfu, b’ħarsa ta’ niket fuq wiċċhom. ¹⁸ Mbagħad wieħed minnhom, jismu Kleofa, wieġeb u qallu: “Inti waħdek il-barrani f’Ġerusalemm li ma tafx x’ġara hemmhekk f’dawn il-jiem?” ¹⁹ “X’ġara?” staqsiehom Ġesù. Qalulu: “Dak li ġara lil Ġesù ta’ Nazaret, li kien profeta setgħan fl-għemil u fil-kliem quddiem Alla u quddiem il-poplu kollu, ²⁰ kif il-qassisin il-kbar u l-kapijiet tagħna tawh f’idejn il-gvernatur biex ikun ikkundannat għall-mewt u sallbuh. ²¹ Aħna konna nittamaw li hu kien dak li kellu jifdi lil Iżrael; iżda issa, fuq kollox ġa għaddew tlitt ijiem minn dawn il-ġrajja! ²² Issa wkoll xi wħud min-nisa tagħna ħasduna, għax marru kmieni ħdejn il-qabar ²³ u l-katavru tiegħu ma sabuhx; ġew jgħidu wkoll li dehrulhom xi anġli li qalulhom li hu ħaj. ²⁴ Mbagħad marru ħdejn il-qabar xi wħud minn tagħna u sabu kollox kif kienu qalu n-nisa, imma lilu ma rawhx!” ²⁵ Qalilhom Ġesù: “Kemm intom boloh u tqal biex temmnu kull ma qalu l-profeti! ²⁶ U ma kellux il-Messija jbati dan kollu u hekk jidħol fil-glorja tiegħu?” ²⁷ U beda minn Mosè u l-Profeti kollha jfissrilhom kull ma kien hemm fl-Iskrittura fuqu.

Punti għall-meditazzjoni:

• Iż-żewġ dixxipli mexjin lejn Għemmaws huma mtaqqlin bil-luttu, dubji u l-konfużjoni. Igħidu dwar Ġesù li “ kien profeta setgħan fl-għemil u fil-kliem,” u jistqarru li “Aħna konna nittamaw li hu kien dak li kellu jifdi lil Iżrael” (v.21). Għalihom, il-kruċifissjoni hi sinjal ta’ falliment, u mhux twettiq. Il-Messija miet u miegħu mietet ukoll it-tama tagħhom. Nipprova nħoss dak li ħassew huma filwaqt li nesprimi d-dubji, il-konfużjoni tiegħi, eċċ.
• Ġesù jersaq qrib – mingħajr ma jagħrfuh – u jimxi magħhom. Meta jistqarru l-konfużjoni tagħhom, Hu jibqa’ miexi magħhom minkejja li sejrin fid-direzzjoni l-ħażina! Hu jbeżbiżhom waħda, “Kemm intom boloh u tqal biex temmnu kull ma qalu l-profeti! U ma kellux il-Messija jbati dan kollu u hekk jidħol fil-glorja tiegħu?” Ninnota r-reazzjoni tagħhom għat-tbeżbiża ta’ Ġesù… X’inhi r-reazzjoni tiegħi?
• “U beda minn Mosè u l-Profeti kollha jfissrilhom kull ma kien hemm fl-Iskrittura fuqu.” Inħalli lil Ġesù jispjegali… X’għandi bżonn nifhem b’mod differenti? Kif nista’ nħalli l-Iskrittura ddawalni?
• Meta ma ndunajtx li Ġesù kien miexi miegħi? Nista’ nipprova niftakar f’mument meta kien preżenti anke jekk jien ma ndunajtx dak il-ħin?
• X’toqol jew tamiet qiegħed inġorr matul din il-mixja?
• X’għandi bżonn nitlaq minn idejja? Hemm xi ħaġa li hemm bżonn inħalli f’idejn Alla?
• Niskot u nisma’. Inħalli l-Iskrittura tkellimni. Inħalli ’l qalbi titkebbes mill-ġdid. Inħalli ’l Ġesù jimxi miegħi, kif mexa mad-dixxipli. Mhuwiex il-bogħod. Jersaq qrib dawk li jfittxuh.

Konverżazzjoni: Nitkellem ma’ Ġesù bħalma ħabib jitkellem ma’ ħabib jew qaddej ma’ sidu.

Testi Oħra:

Xi spjega Ġesù? Dak li qalu l-profeti

San Luqa ma qalilniex Ġesù x’qal lid-dixxipli waqt il-mixja imma nistgħu nippruvaw naqtgħu liema profeziji semmielhom – testi li tkellmu dwar it-tbatija, il-mewt u l-glorja tal-Messija.

1. Il-Qaddej li jsofri

“Iżda hu kien miġruħ minħabba fi dnubietna, misħuq minħabba fi ħżunitna. Għas-saħħa tagħna waqa’ l-kastig fuqu, u bis-swat tiegħu sibna l-fejqan tagħna.” (Isaija 53:5)

2. Il-Ġebla mwarrba

“Il-ġebla li warrbu l-bennejja saret il-ġebla tax-xewka.” (Salm 118:22)

3. Il-Minfud

“U huma jħarsu lejn dak li jkunu nifdu, u jibkuh bħal wieħed li jibki lil ibnu l-waħdieni…” (Żak 12:10)

4. Ir-Re Rxuxtat

“Għax int ma titlaqnix fl-imwiet, ma tħallix il-maħbub tiegħek jara l-qabar.” (Salm 16:10)

5. Il-Patt il-Ġdid

“jien nagħmel patt ġdid… Għax jien naħfrilhom ħżunithom, u ħtijiethom aktar ma niftakarhomx.” (Ġer 31:31-34)

It-Tieni Parti: Lura lejn Ġerusalemm: Luqa 24:28–35

Test: Lq 24:28-35
²⁸ Meta qorbu lejn ir-raħal fejn kienu sejrin hu għamel ta’ birruħu li hu kien se jibqa’ sejjer aktar ‘il bogħod. ²⁹ Iżda huma ġegħluh jibqa’ magħhom u qalulu: “Ibqa’ magħna, għax issa sar ħafna ħin u l-jum ġa wasal biex jintemm.” Mbagħad daħal biex joqgħod magħhom. ³⁰ U waqt li kien fuq il-mejda magħhom, qabad il-ħobż, qal il-barka, qasmu u tahulhom. ³¹ Mbagħad infetħulhom għajnejhom u għarfuh, iżda hu għab minn quddiemhom. ³² U wieħed lill-ieħor bdew jgħidu: “Ma kinitx imkebbsa qalbna ġewwa fina huwa u jkellimna fit-triq u jfissrilna l-Iskrittura?” ³³ Dak il-ħin stess qamu u reġgħu lura Ġerusalemm. Hemm sabu lill-Ħdax u lil sħabhom miġbura flimkien, ³⁴ u dawn qalulhom: “Il-Mulej qam tassew, u deher lil Xmun!” ³⁵ U huma wkoll tarrfulhom x’kien ġralhom fit-triq, u kif kienu għarfuh fil-qsim tal-ħobż.

Nitlob permezz tal-immaġinazzjoni filwaqt li nilqa’ ’l Ġesù d-dar: “Ibqa’ magħna”.

Dawn il-passi jistgħu jgħinu:

1. Niffamiljarizza ruħi mas-silta…
2. Preżenza: Nimmaġina il-post; nimmaġina x-xena.
3. Inpoġġi lili nnifsi fix-xena fejn inħossni “mistieden” li noqgħod.
4. Nitlob il-grazzja li nilqa’ ’l Ġesù b’mod sħiħ f’ħajti.
5. Nuża s-sensi kollha:

• Inħares lejn il-persuni: Kif inhuma?; Ninnota l-espressjonijiet ta’ wiċċhom; X’emozzjonijiet qegħdin iħossu?; X’inhu għaddej minn qalbhom?
• Nisma’ dak li jgħidu: Insegwi l-konverżazzjonijiet bejniethom; nimmaġina dak li jkunu qegħdin jaħsbu bejnhom u bejn ruħhom.
• Nosserva dak li jagħmlu: X’inhuma jagħmlu?; Nersaq viċin lejhom u ninteraġixxi magħhom jekk nixtieq.

6. Nitkellem ma’ Ġesù bħalma ħabib jitkellem ma’ ħabib u nisma’ dak li jgħidli.