Loyola – Nisimgħu il-Movimenti Interjuri

[ENGLISH VERSION]

Grazzja: Li nagħraf dawk il-movimenti interjuri li jqarrbuni lejn Alla u dawk li jbiegħduni minnu.

Pawsa: Ninnota n-nifs tiegħi u nagħti kas dak li hemm ġewwa fija.

Mill-Awtobiografija: Il-mument ta’ bidla f’Loyola

Waqt li kien qed jirkupra minn ferita serja f’siequ, li ħallietu mixħut fis-sodda, Injazju kien iqatta’ l-ħin joħlom dwar avventuri ta’ kavallerija u kif seta’ jirbaħ il-qalb ta’ ċertu mara nobbli. Dawn il-ħsibijiet kienu jżommuh medhi għal sigħat sħaħ u jagħtuh pjaċir għal ftit żmien, iżda wara kienu jħalluh iħossu vojt u mdejjaq.

Peress li fid-dar ma kienx hemm kotba ta’ stejjer romantiċi jew ta’ kavallerija, tawh jaqra Il-Ħajja ta’ Kristu u Il-Fjuri tal-Qaddisin. Hekk kif beda jaqra dawn il-kotba għal darba wara l-oħra, bdew jitqanqlu fih xewqat spiritwali ġodda. Beda jimmaġina lilu nnifsu jagħmel affarijiet kbar għal Alla u jistaqsi: “U jekk nagħmel dak li għamel San Franġisk? U jekk nagħmel bħal San Duminku?” Dawn il-ħsibijiet kienu jimlewh b’ferħ li jibqa’, għall-kuntrarju tal-ħolm mondan li kien iħallih vojt minn ġewwa.

Bil-mod il-mod, Injazju beda jagħraf din id-differenza. Din kienet l-ewwel esperjenza tiegħu tad-dixxerniment tal-ispirti. Il-ħsibijiet dwar Alla kienu jġibulu konsolazzjoni li tibqa’, filwaqt li l-ħsibijiet dwar il-vanità kienu jħalluh imdejjaq. Din l-għarfien aktar tard sar il-pedament tal-Eżerċizzi Spiritwali.

Eżerċizzi Spiritwali 315: “Hu proprju tal-ispirtu t-tajjeb li jagħti kuraġġ u qawwa, konsolazzjonijiet, dmugħ, ispirazzjonijiet u paċi.”

• Fiż-żmien tal-konvalexxenza tiegħu Injazju għaraf id-differenza bejn dak li verament jagħtih ferħ f’ħajtu minn dak li jagħtih pjaċir temporanju. Inkun attent/a għal dak li inħoss f’qalbi biex nagħraf dak li ġej minn Alla u dak li mhux. 
• Injazju seta’ jifhem dak li hemm f’qalbu tiegħu għax sab ruħu fil-kwiet.  Naħseb f’dak li jiddistrani milli nagħraf dak li hemm verament fil-fond ta’ qalbi. 
• Alla kkomunika ma’ Injazju b’mod li seta’ jifhmu hu, u mexa b’pass li seta’ jifhmu sew Injazju.  Nagħraf li Alla jimxi miegħi bil-pass tiegħi u nitlob li nagħraf l-azzjoni tiegħu ħajti.

Il-konverżjoni bil-mod il-mod ta’ Injazju, tirrifletti l-ġentilezza u l-paċenzja li biha Ġesù jfejjaq ir-raġel għama fis-silta li ġejja. La Injazju u lanqas l-għama ma jirċievu d-dawl f’salt. Kellhom bżonn iħallu ’l Ġesù jmexxihom u jfejjaqhom.

Il-Kelma ta’ Alla: Mk 8:22-26

Aqra s-silta li ġejja bil-mod u b’qalb miftuħa.

Waslu Betsajda, u ħadulu quddiemu raġel agħma u talbuh imissu. Qabad l-agħma minn idu u ħadu barra mir-raħal, beżaqlu f’għajnejh, qiegħed idejh fuqu u staqsieh: “Qiegħed tara xi ħaġa?” Dak ħares ’il fuq u qal: “Qiegħed nara n-nies, imma qiegħed narahom donnhom siġar mexjin.” Imbagħad raġa’ qegħedlu idejh fuq għajnejh, u beda jara ċar: u kien imfejjaq, hekk li sar jara kollox tajjeb mill-bogħod ukoll. Bagħtu lura lejn daru, u qallu: “Qis li ma tgħid xejn meta tmur ir-raħal.”

Mistoqsijiet għar-Riflessjoni:

• Liema ħsibijiet iġegħluni nħossni aktar mimlija ħajja, tama u paċi?
• F’liema mumenti ta’ ħajti nħoss lil Ġesù jaqbadni minn idi u jmexxini bil-ħlewwa ’l bogħod mill-istorbju jew mill-qtigħ il-qalb? Lejn xiex qiegħed iħeġġiġni bil-ħlewwa f’dan il-mument?
• F’liema aspetti ta’ ħajti għadni qed nara b’mod imċajpar, mingħajr ma nara l-affarijiet ċari? Għal xiex jista’ Ġesù qiegħed jistidinni nafdah fil-proċess bil-mod u gradwali tal-fejqan?

Konverżazzjoni: Indur lejn Alla/Ġesù u nitkellem miegħu bħalma nitkellem ma’ xi ħadd li jafni sew u jħobbni ħafna.

• Naqsam miegħu dak li għandi f’qalbi: il-ferħ, it-tħassib, it-taqbidiet u t-tamiet tiegħi.
• Nagħżel ħaġa waħda żgħira u konkreta li nħoss li nixtieq inwettaq fil-ħajja tiegħi ta’ kuljum.
• Nirringrazzja lil Alla għal __________ u nitolbu jmexxini u jurini t-triq jekk għadni ma narax ċar.

 Nikteb il-ħsibijiet u t-talb tiegħi: