L-Għażla ta’ Alla tal-Faqar u l-Umiltà
ENGLISH VERSION
Punti biex nitlob bl-immaġinazzjoni:
Immaġina l-ġrajja bħallikieku qed tagħmel film, ħalli lilek innifsek tidħol kompletament fix-xena.
Oqgħod attent għad-dettall billi tinvolvi s-sensi tiegħek: id-dehriet, il-ħsejjes, it-togħmiet, ir-riħa u s-sentimenti tal-ġrajja.
F’xi punt, poġġi lilek innifsek fix-xena (eż., bħala spettatur, qaddej, jew wieħed mill-karattri).
“Intilef” fl-istorja. Tinkwetax jekk l-immaġinazzjoni tiegħek tidher li qed “tiġri wisq” jew tmur lil hinn mit-test speċifiku. Afda li Alla jista’ jikkomunika miegħek b’mod personali u evokattiv permezz ta’ din it-talba.
Jekk tinkwieta dwar li tmur “wisq “’il bogħod,” iċċekkja r-riżultat tal-immaġinazzjoni tiegħek:
Wasslitek eqreb lejn Alla jew aktar ’il bogħod?
Jekk issibha diffiċli l-viżwalizzazzjoni, tisforzahiex. Alla jista’ jkellmek permezz ta’ intuwizzjoni jew reazzjoni vixxerali jew billi tisma’ jew tħoss l-istorja aktar milli taraha.
Fl-aħħar mill-aħħar, itlob kif tista’ fi spirtu ta’ ġenerożità. Alla se jkellmek permezz tal-intellett, l-emozzjonijiet, jew l-immaġinazzjoni tiegħek.
- Adattat minn The Ignatian Adventure ta’ Kevin O’Brien, SJ
Insib post kwiet u npoġġi ruħek fih. Dak il-post huwa sagru għal dan iż-żmien, għax se niltaqa’ ma’ Alla hawn. Insir konxju tan-nifs tiegħi. Nitlob lill-Mulej għall-Ispirtu Tiegħu biex jgħinni nwaqqaf id-distrazzjonijiet, nafda fil-gwida tiegħu u nħoss il-preżenza Tiegħu.
Punti għat-talb
Nistrieħ f’post kwiet
Naqra u niffamiljarizza ruħi mat-test. Nħalli t-test matul il-ħin tat-talb li jifdal.
It-Twelid ta’ Ġesù (Lq 2:1-20)
1F’dik il-ħabta Ċesari Awgustu ħareġ digriet biex isir ċensiment fid-dinja kollha. 2Dan kien l-ewwel ċensiment li sar meta Kirinu kien gvernatur tas-Sirja. 3U kulħadd mar biex jinkiteb, kull wieħed fil-belt tiegħu. 4Ġużeppi wkoll mar mill-Galilija, mill-belt ta’ Nazaret, u tala’ l-Lhudija, fil-belt ta’ David jisimha Betlehem – għax hu kien mid-dar u l-familja ta’ David – 5biex jinkiteb flimkien ma’ Marija l-għarusa tiegħu, li kienet tqila. 6Ġara li, meta kienu hemm, Marija għalqilha ż-żmien biex teħles, 7u wildet l-ewwel iben tagħha, fisqietu u medditu f’maxtura, għax ma kienx hemm post għalihom fil-lukanda.
8F’dawk l-inħawi kien hemm xi rgħajja fir-raba’, għassa mal-merħla tagħhom billejl. 9U dehrilhom anġlu tal-Mulej, il-glorja tal-Mulej iddiet madwarhom, u qabadhom biża’ kbir. 10Iżda l-anġlu qalilhom: “Tibżgħux, għax araw, qiegħed inħabbrilkom ferħ kbir, ferħ li se jkun għall-poplu kollu. 11Illum, fil-belt ta’ David, twildilkom Salvatur, li hu l-Messija, il-Mulej. 12U bħala sinjal ikollkom dan; issibu tarbija mfisqija u mimduda f’maxtura.” 13F’daqqa waħda ngħaqdu mal-anġlu għadd kbir ta’ qtajja’ tas-sema, ifaħħru lil Alla u jgħidu:
14“Glorja lil Alla fl-ogħla tas-smewwiet,
u sliem fl-art lill-bnedmin li jogħġbu lilu
!”
15Meta mbagħad l-anġli ħallewhom u telgħu s-sema, ir-rgħajja bdew jgħidu lil xulxin: “Ejjew immorru Betlehem ħa naraw x’ġara kif għarrafna l-Mulej.” 16Marru mela jgħaġġlu, u sabu lil Marija u ’l Ġużeppi, bit-tarbija mimduda f’maxtura. 17Kif raw dan, bdew jgħarrfu b’kulma kien intqal lilhom dwar dik it-tarbija,
18u kull min semagħhom baqa’ mistagħġeb b’dak li qalulhom ir-rgħajja. 19Marija, min-naħa tagħha, baqgħet tgħożż f’qalbha dawn il-ħwejjeġ kollha u taħseb fuqhom bejnha u bejn ruħha. 20Ir-rgħajja mbagħad reġgħu lura, isebbħu u jfaħħru lil Alla għal kulma kienu raw u semgħu, kif l-anġlu kien qalilhom.
2. Nitlob grazzja li nixtieq nirċievi
Nista’ nitlob biex nirrikonoxxi u nimita l-umiltà profonda u l-azzjoni ta’ mħabba preżenti fil-mumenti ordinarji tat-twelid ta’ Ġesù (jew tista’ tkun xi grazzja oħra).
3.Nimmaġina x-xena
- Niftakar il-persuni u l-iskop tal-vjaġġ.
- Nimmaġina l-post: it-triq minn Nazaret sa Betlehem; it-tul u l-wisa’ tagħha; it-terren; il-post jew l-għar; Kif inhu mgħammar?
- Nimmaġina t-taħbit u t-tbatija.
- Dan kollu mingħajr pompa u storbju, iżda b’umiltà u mħabba kbira.
4. Nara l-persuni b’attenzjoni:
- Marija, Ġużeppi, it-tarbija Ġesù, ir-rgħajja, u kwalunkwe oħrajn preżenti.
- Kif inhuma wiċċhom? X’inhuma lebsin? X’inhuma l-istati emozzjonali tagħhom? X’qed jiġri f’qalbhom?
- Ninnota l-umiltà u l-faqar tagħhom f’nofs ġrajja divina bħal din.
5. Nisma’ bil-qalb il-konverżazzjonijiet:
- Il-messaġġ tal-anġlu, il-konverżazzjoni ta’ Marija u Ġużeppi, il-ferħ tar-rgħajja.
- Nimmaġina d-diskors intern f’moħħ u qalb kull persuna.
6. Nosserva b’imħabba:
- X’qed jagħmlu n-nies?
- Azzjonijiet ordinarji li fihom tiżvolġi l-qdusija: Marija twelled, Ġużeppi jieħu ħsieb il-bżonnijiet tagħhom, it-tarbija titqiegħed fil-maxtura, ir-rgħajja jiġru fuq il-post, u jfaħħru lil Alla meta jirritornaw.
Inħossni liberu li nersaq lejhom b’rispett u riverenza. Nista’ nimmaġina lili nnifsi bħala qaddejja, spettatur, jew saħansitra annimal fl-istalla… preżenti biex naqdi u nara x-xena…
Konverżazzjoni: Nidħol f’konverżazzjoni ma’ Marija jew ma’ Ġużeppi, jew ma’ Alla l-Missier, jew saħansitra billi nkellem lit-tarbija Ġesù waqt li nżommu f’idejja. Jew nista’ sempliċement noqgħod fis-skiet paċifiku tal-lejl.
Iktar riflessjoni:
- X’inhuma tliet mumenti ordinarji (xogħol tad-dar, rutini, konversazzjonijiet) li nixtieq li jmorru ftit differenti kuljum?
- Kif nista’ nikkollabora ma’ Alla biex inġib l-istess imħabba kbira u umiltà tan-Natività f’dawk il-mumenti, u nibdilhom f’”Mument Qaddis”?
Xhieda
San Franġisk ta’ Assisi ħoloq l-ewwel xena tan-Natività
Franġisk ried li n-nies ordinarji japprezzaw ir-realtà drammatika tat-tbattil tiegħu nnifsu ta’ Alla, u għalhekk fl-1223 f’Greccio huwa ħoloq mill-ġdid l-ewwel xena tan-Natività: “biex inqajjem il-memorja ta’ dik it-tarbija mwielda f’Betlehem, biex nara kemm jista’ jkun b’għajnejja stess l-iskumdità tal-bżonnijiet tat-tarbija tiegħu, kif kien mimdud f’maxtura, u kif, b’barri u ħmar ħdejh, kien mimdud fuq sodda tat-tiben.”
Source: Christmas: A Special Feast for Franciscans | CFIT
San Bonaventura: Riflessjoni dwar in-Natività
Dak li hu daqshekk kbir u għani sar żgħir u nieqes għalina: għażel li jitwieled mhux f’dar imma fi stalla, li jkun imgeżwer fil-faxex, li jixrob il-ħalib verġinali, li jimtedd f’maxtura bejn barri u ħmar. Kien dakinhar li “deher fuqna jum ta’ fidwa ġdida, restawr tal-passat, u hena għal dejjem”… Mela issa, ruħ tiegħi, ħaddan dik il-maxtura sagra; agħfas xufftejk fuq saqajn it-tifel f’bewsa devota: imbagħad f’moħħok żomm l-għassa tar-rgħajja; stagħġeb bil-ġemgħa tal-anġli miġbura; ingħaqad mal-melodija tas-sema, waqt li tkanta b’leħnek u b’qalbek: “Glorja lil Alla fl-għoli tas-smewwiet, u paċi fl-art lill-bnedmin ta’ rieda tajba.” (“Siġra tal-Ħajja,” 1.4)
Leave a Reply